Nche sunt coladas giai belle duas chidas dae cando, sàbadu 14 de làmpadas, in Santa Justa prus de 150 pessones si sunt reunidas pro fàghere unu
resumu subra de sa chistione limba dae cando in sa Regione mancat su diretore
de su servìtziu de limba e cultura sarda. In cust’ocasione in Santa Justa s’est
batigiadu su CSU: Coordinamentu pro su Sardu Ufitziale.
Dae custa reunione est
essidu a campu su pistighìngiu mannu de
totus: in sos annos colados su traballu, in contu de limba, est istadu fatu e
como sa timòria est chi sas cosas acabent gasi comente chi nudda esserat. Sa
gente impinnada cun sa limba est meda: giòvanos chi in custos annos ant crètidu
in custa terra, in una classe dirigente e mescamente in sa limba impinnende cun sacrifìtziu fortzas,
tempus e dinare pro si formare.
Si sunt naradas cosas meda e como
su chi servit est unu sinnale dae su Palatu, sa polìtica linguìstica la
faghimus fintzas nois sardos cada die cando impreamus su sardu sena dudas o
timòrias ma la faghent fintzas sos chi sunt sa ghia nostra e chi pro a nois
detzidint: sa classe dirigente, sos chi sos sardos ant seberadu.
Totus semus de acordu: un’istandard
lu tenimus e unu nde devimus impreare, mancari diat èssere de megiorare. Si
damus cara però fortzis nos sapimus chi, a banda de chistiones tècnicas, su chi
mancat est su chistionu in sa buca de sa gente. B’at cuntierra manna pro custa
manera de iscrìere ma gente galu paga chi sustenet sa limba cun su manìgiu e s’impreu
cada die, mescamente sos pitzinnos sunt sos chi la diant dèvere imparare e
sighire a contivigiare in su benidore ma oi dolore gasi no est, sos pitzinnos
de oe chi imparant su sardu sunt gutios in su mare abertu…….sa neghe de seguru no est s'issoro.
Duncas tempos de treulu mannu, paràulas, a bortas fintzas graes, chi andant e torrant…….Paràulas emmo, ma fatos bi cherent fatos, sa limba
campat, sighit a mantènnere s’àlinu si est chistionada, e galu custu, in sa conca
de sos sardos, totus mannos e minores, no est intradu.
Pro nde ischire de prus leghe sos artìculos chi sighint:
Nessun commento:
Posta un commento