Sòtziu Tenores, atòbiu de serrada.

Acabada cun resurtados mannos s'initziativa de su Sòtziu Tenores de Sardigna.

Sàbadu su 31 de maju, in Abbasanta, in sa sala de su tzentru servìtzios de su Nuraghe Losa at acabadu sa  manifestatzione chi at bidu impinnados totus sos tenores de Sardigna, sos atòbios in 28 biddas de Sardigna si sunt pòtzidos fàghere gràtzias a sa disponibilidade de s’assessore a sa cultura e a su diretore de su servìtziu limba sarda de sa legisladura colada .

Gente meda at leadu parte.

S’atòbiu est comintzadu cun sos saludos de su Sìndigu de Abbasanta, posca at chistionadu s’ex assessore regionale a sa cultura chi at naradu chi dae s’identidade si podet torrare a partire, sos tenores, at sighidu, sunt lìberos fintzas prus de is Gigantes de Monti Prama, issos sunt gente chi non devet torrare contos a nemos e rapresentant sa Sardigna. S’assessore at crèchidu meda in custu progetu, at nadu:

<<abbiamo aiutato chiunque abbia avuto buone idee, […] Mi auguro che si continui, il problema è la continuità. Ripartiamo dalla nostra identità lasciando polemiche e odio….>>

paràulas bellas e chi a beru ponent a pensare mescamente in custa muta chi sa limba est colande tempos dìligos in cale si siat àmbitu.

Sos reladores de custu atòbiu fiant Peppinu Cocco e Bustianu Pilosu, su primu at chistionadu de s’istòria e orìgine de su tenore e de furisteris arribados a Sardigna a s’acabu de su 1800 chi ant tratadu, e duncas documentadu, in sas òperas issoro su cantu a tenore. A pustis de Cocco at chisionadu su segretàriu de su sòtziu Tenores Antiogu Bussu chi at contadu s’istòria de su sòtziu Tenores: comente est nàschidu, e fintzas de su fatu chi su cantu a tenore est istadu reconnotu dae s’Unesco “Patrimonio intangibile dell’Umanità”.

Ant chistionadu fintzas àteros comente su presidente de su sòtziu Salvatore Ghisu.

Dae sos interventos est essida a campu s’urgèntzia e sa netzessidade chi su sardu e sa cultura sarda intrent in iscola ma cun sa matessi dignidade de sas àteras limbas e dissiplinas, custu protzessu devet però èssere promòvidu dae s’Istitutzione e non pro more sa bona volontade e idea de pagos.

Bustianu Pilosu, in s’interventu suo, at torradu a bogare a pìgiu sas paràulas de s’assessore chi at naradu chi sos tenores sunt lìberos, difatis Pilosu at annantu chi sas amministratziones andant e torrant e duncas sos tenores non sunt nen de manca, nen de dereta e nen de tzentru, nen de artu e nen de bassu! Pilosu at naradu: <<tenimos ideas de milli maneras, non podimos àere opiniones, semus adurados a banda dae sa polìtica>> at sighidu narende chi s’est sapidu chi in sas iscolas sa situatzione est grave meda e chi b’at una responsabilidade manna chi est cussa de contivigiare su bene culturale de sa Sardigna: sa limba..

Sas paràulas prus galanas de Pilosu, chi ant tocadu sas cordas de sas intragnas de sos chi a beru su sardu l’istimant, fortzis sunt custas :

<<SA LIMBA EST S’IDEA CHI NOIS TENIMOS DE NOIS MATESSI>>

paràulas fungudas chi narant meda de su chi semus, o mègius de su chi calicunu at atzetadu, (a ogros serrados, origras surdas e buca serrada) de èssere e chi galu si sighit a atzetare, non totus mancu male……….

<<In su tenore, at sighidu Pilosu, colat s’arrejonu de sa limba, ca si cantat s’istòria de sos sardos, b’at un’interpretatzione musicale de sa vida nostra, no importat chi s’Unesco l’apat reconnotu comente patrimòniu, semus nois chi lu devimus reconnòschere, nois cantamus in sardu no in su faeddu de sa bidda. Nois non faghimus polìtica partìtica ma polìtica culturale; chie amministrat devet ischire su chi est faghinde, devet àere cussèntzia….>>

S’atòbiu at sighidu cun sos cantos de:

·                     Tenore de Supramonte de Orgòsolo

·                     Tenore Santu Gavinu de Illorai

·                     Tenore Santu Padre de Bortigale

·                     Cuntratu de Seneghe

·                     Cuntzertu Abbasantesu.

Duncas custa manifestatzione est bene resurtada, in totus sas biddas gente meda at leadu parte.

Totus sos reladores ant tratadu cun cumpetèntzia manna sas chistiones.

Ammentamus chi sa limba est mèdiu pro istare in unu mundu, rapresentat totu unu mundu, su sardu rapresentat su mundu sardu totu totu, duncas non si podet pensare a una Sardigna sena sardu, 

e tando fortza ma totus impare !

E.... àteros annos mègius!