Connòschere sas limbas.

Su de connòschere sas limbas est una richesa manna ca in custa manera si connoschent prus mundos e maneras de èssere de sa gente e sa cultura issoro. In Nùgoro, lunis 8 - duas dies a oe, Antonella Sorace at sutalineadu chi sos vantàgios de connòschere duas o prus limbas non benint dae su prestìgiu chi custas tenent, custa est un cosa chi tocat de ammentare bene e semper ca galu oe a dolu mannu medas sighint a pensare chi su sardu non servit e no est bidu dae medas comente una limba prestigiosa... Ma gasi no est ca essende limba dat sos matessi vantàgios chi podet dare una limba ispartzighinada meda comente podet èssere su tzinesu o s'inglesu. 

E tando, it'est una limba? 

Est una manera de tratare unu mundu, de lu rapresentare, est una manera de presentare e animare sa cultura de unu pòpulu.

Sas dibatas subra de sa limba in Sardigna sunt paritzas e durant dae tempus meda, s'ùnicu profetu pro su sardu oe est cussu de èssere trasmìtidu  a sos pitzinnos ca gasi ebbia podet sighire a si mantènnere, custas cosa las ischimus ma su prus si nche las ismentigant...

 

Su Consìgiu de Europa at decraradu su 2001 comente ANNU EUROPEU DE SAS LIMBAS, dae tando su 26 de cabidanni de cada annu si festat sa die europea de sas limbas, pro reconnòschere s'importu de s'imparu de sas limbas e pro ammentare chi sa diversidade linguìstica e culturale est ocasione de arrichimentu e de crèschida personale, de iscàmbiu interculturale e mèdiu pro acosiare sos pòpulos. 

Cust'annu, domìniga su 21 de cabidanni, in Sèdilo fintzas nois sardos amus a festare sa die europea de sas limbas: su (CSU) Coordinamentu pro su Sardu Ufitziale ammàniat paris cun sa comuna de Sèdilo sa Festa de sa Limba Ufitziale, una manera pro promòvere e amparare su sardu e s'istandard gràficu suo promòvidu dae su 2006 chi dae tando a oe mancari a bortas trobeidu s'est ispartu in sa retza, in s'editoria, in sa literadura, in poesia e fintzas in iscola.

Su CSU cùmbidat totus: su Cussìgiu regionale, sos sìndigos, àteros entes e s’opinione pùblica. 

S'apuntamentu est a sas 9.30 de domìniga 21 de cabudanni in Sèdilo in su salone de ‘Sa prima Ighina’ in pratza de Santu Giuanne.

Pro sos amantiosos de sa letura: artìculu de importu. Leghe.